សេចក្តីសង្ខេបអំពីកម្មវិធី
កម្មវិធីអ្នកសារព័ត៌មានពលរដ្ឋរបស់ CCIM មានគោលបំណងធ្វើឲ្យមានការចូលរួមពីសហគមន៍ ជាពិសេសតាមបណ្ដាខេត្តនានា ដើម្បីរាយការណ៍ព័ត៌មានទៅកាន់ប្រព័ន្ធផ្សព្វផ្សាយ និងបណ្ដាញសង្គម ឲ្យក្លាយជាការរួមចំណែកក្នុងការផ្តល់ដំណឹងដល់សាធារណជនអំពីអ្វីៗកំពុងកើតមានទូទាំងប្រទេស។ CCIM បានចូលរួមបណ្ដុះបណ្ដាលអ្នកសារព័ត៌មានពលរដ្ឋតាំងពីឆ្នាំ ២០១៣ មក ហើយបច្ចុប្បន្ននេះ ក៏កំពុងពង្រីកបណ្តាញអ្នកសារព័ត៌មានពលរដ្ឋ ដើម្បីពង្រីកការចូលរួមរបស់ប្រជាពលរដ្ឋកម្ពុជា ក្នុងការរាយការណ៍ព័ត៌មានផងដែរ។ អ្នកសារព័ត៌មានពលរដ្ឋមានតួនាទីសំខាន់ក្នុងការកត់ត្រា និងរាយការណ៍អំពីបញ្ហាសហគមន៍ទៅសាធារណជន ដែលជាញឹកញាប់មិនសូវបានរាយការណ៍ដោយប្រព័ន្ធផ្សព្វផ្សាយសំខាន់ៗទេ។
នៅឆ្នាំ ២០២៣ CCIM បានចាប់ផ្តើមគម្រោងសាកល្បង «ប្រព័ន្ធផ្សព្វផ្សាយសហគមន៍» ដែលមានគោលបំណងផ្ដល់អំណាចដល់ប្រជាពលរដ្ឋឲ្យមានវេទិកាផ្ទាល់ខ្លួន ដើម្បីចែករំលែកព័ត៌មានពីសហគមន៍របស់ពួកគេ។ កម្មវិធីនេះផ្តោតលើការបណ្ដុះបណ្ដាលអ្នកសារព័ត៌មានពលរដ្ឋឲ្យចេះគ្រប់គ្រង និងដំណើរការប្រព័ន្ធផ្សព្វផ្សាយក្នុងសហគមន៍របស់ខ្លួនផ្ទាល់។
គម្រោងសំខាន់ៗ
ក្លឹបប្រព័ន្ធផ្សព្វផ្សាយ ១០១ រាជធានីភ្នំពេញ
ក្លឹបនេះគឺជាកន្លែងសិក្សារបស់យុវជន ជាពិសេសនិស្សិតសាកលវិទ្យាល័យនៅទីក្រុងភ្នំពេញ ដើម្បីបង្កើនជំនាញអក្ខរកម្មប្រព័ន្ធផ្សព្វផ្សាយ និងព័ត៌មាន តាមរយៈវគ្គបណ្តុះបណ្តាលអន្តរកម្ម ការពិភាក្សា និងសកម្មភាពអនុវត្តជាក់ស្តែង។
ក្លឹបប្រព័ន្ធផ្សព្វផ្សាយ ១០១ ខេត្តសៀមរាប
ក្លឹបប្រព័ន្ធផ្សព្វផ្សាយ១០១ សហការជាមួយសាកលវិទ្យាល័យបញ្ញាសាស្ត្រ សាខាខេត្តសៀមរាប បានផ្តល់ឱកាសឱ្យយុវជនក្នុងតំបន់ ស្វែងយល់អំពីអក្ខរកម្មប្រព័ន្ធផ្សព្វផ្សាយ និងព័ត៌មាន។ និស្សិតចែករំលែក និងពិភាក្សាអំពីទម្លាប់ប្រើប្រាស់ប្រព័ន្ធផ្សព្វផ្សាយរបស់ពួកគេ បង្កើតផលិតមាតិការប្រព័ន្ធផ្សព្វផ្សាយដូចជារូបថត និងវីដេអូ និងអភិវឌ្ឍជំនាញជាក់ស្តែងតាមរយៈវគ្គអន្តរកម្ម និងគម្រោងផ្សេងៗ។
តស់! និយាយឌីជីថល
ជាវេទិកាវីដេអូផតខាស ស្ដីពីសិទ្ធិឌីជីថល សុវត្ថិភាពឌីជីថល និងអក្ខរកម្មប្រព័ន្ធផ្សព្វផ្សាយ និងព័ត៌មានឌីជីថល។ កម្មវិធីនេះមានការចូលរួមពីអ្នកជំនាញលើប្រធានបទផ្សេងៗ ដើម្បីពិភាក្សាអំពីបញ្ហាប្រឈមឌីជីថលក្នុងជីវិតពិត និងជួយឱ្យទស្សនិកជនស្វែងយល់ពីបរិយាកាសឌីជីថលកាន់តែមានសុវត្ថិភាព និងទំនួលខុសត្រូវ។
